(“Гоман Барысаўшчыны” №10(115) за 2008 год)

Менавіта так зараз выглядае месца, дзе раней знаходзілася школа №4. Нагадаем, што гэты будынак быў узведзены ў 1936 годзе і па прызначэнню выкарыстоўваўся да 1991 года. Пасля закрыцця школы яе будынак і яго гаспадарчыя інфраструктуры былі ў добрым стане. Аднак ён быў пакінуты і разрабаваны. У выніку апошнім часам яго стан стаў настолькі небяспечным, што трагедыя ля яго магла адбыцца ў любы момант. Таму было вырашана з дапамогаю спецыялістаў Міністэрства па надзвычайных сітуацыях яго знішчыць. Працы пачаліся яшчэ напрыканцы жніўня. Не скончыліся яны цалкам і зараз. Але ўжо ад былога будынка школы засталіся толькі горы будаўнічага смецця...

Гэта толькі малая частка будынкаў Барысава, якія могуць паўтарыць лёс былой школы №4:

Былая пажарная каланча па вуліцы Дзяржынскага (ля скрыжывання з вуліцай Нармандыя-Нёман)
На пачатку ХХ стагоддзя быў адным з найбольш адметных грамадскіх будынкаў Барысава. Знаходзіцца ў закінутым стане амаль дзесяць год. Будынак даўно разрабаваны.

Будынак па вуліцы Дзяржынскага, 76 (канца ХІХ – пачатку ХХ стагоддзяў; былая санстанцыя)
Стары будынак у самым гістарычным цэнтры горада. Вызваліўся пасля аб’яднання горада з раёнам. З боку вуліцы вонкавы стан дома падтрымліваецца. З астатніх – выбіты вокны. Будынак разрабаваны.

Былы гарадскі дом культуры (пазней – дом культуры фабрыкі піяніна; знаходзіцца па вуліцы 40 Год ВЛКСМ)
Закінуты пасля ўзнікнення эканамічных цяжкасцяў завода. Вокны часткова выбіты, дзверы доўгі час былі зламаныя. Будынак разрабаваны. Напярэдадні Дня пісьменства вокны на першым паверсе і ўваход забіты.

Былыя казармы і іншыя вайсковыя будынкі  (знаходзяцца ў Лядзішчах)
Комплекс з разнастайных па прызначэнню вайсковых будынкаў, якія ўжо не адзін не выкарыстоўваюцца, разрабаваны. Закінутыя (і нават знішчаныя) былыя вайсковыя будынкі маюцца і ў іншых частках горада.